डम्मर धामी, काठमाडौँ । राष्ट्रपति रामचन्द्र पौडेल मुटुमा पुन: समस्या देखिएपछि अस्पताल भर्ना भएका छन् । मध्यरातमा त्रि बि शिक्षण अस्पताल महाराजगन्जमा  पुर्याइएका राष्ट्रपति पौडेललाई बिहान नै  मनमोहन कार्डियो भास्कुलर लगिएको  हो । 

पौडेलको मुटुमा समस्या देखिएपछि २ बजे राति त्रिवि शिक्षण अस्पताल लगिएको हो । टिचिङबाट आज बिहान ५ बजे मनमोहन कार्डियो थेरासिस भास्कुलर एन्ड ट्रान्स प्लान्ट सेन्टरमा लगिएको छ । अहिले उनको सिसियूको क्याबिनमा राखेर उपचार भइरहेको जनाइएको छ । 

केही दिन अघि पनि मुटुमा समस्या आएपछि  अस्पताल भर्ना भएका थिए । उनी अघिल्लो महिना मात्रै भारतको नयाँ दिल्लीमा  उपचार गरी फर्केका थिए । 

गएको सोमबार प्रधानमन्त्री पुष्पकमल दाहाल ‘प्रचण्ड’ स्वास्थ्य परीक्षणका लागि नर्भिक इन्टरनेसनल हस्पिटल पुगे । पत्नी सीता दाहालसहित अस्पताल पुगेका उनले आफ्नो पनि स्वास्थ्य परीक्षण गराए ।

अस्पतालका अनुसार सम्पूर्ण स्वास्थ्य परीक्षणका क्रममा प्रधानमन्त्रीमा उच्च रक्तचाप र मधुमेहको समस्या देखियो । नेपाली काँग्रेसका सभापति शेरबहादुर देउवा पनि १ साताका लागि सिंगापुर गएका छन् । उनी पनि स्वास्थ्य समस्याकै कारण सिंगापुर गएका हुन् । नियमित स्वास्थ्य परीक्षणका लागि देउवा सिंगापुर  गएका हुन् । 

उपचारका लागि विदेश नजाने बताएका  देउवा आफै उपचारका लागि विदेश गएका हुन् । नेपालमा अधिकांश नेतृत्व तहमा रहेका नेताहरू कुनै न कुनै रोगबाट ग्रसित छन् । 

नेपालका शीर्ष नेताहरू केपी शर्मा ओली, प्रधानमन्त्री प्रचण्ड, राष्ट्रपति, महन्त ठाकुर, माधव नेपाल कुमार नेपाल झलनाथ खनाल र शेर बहादुर देउवालाई विभिन्न प्रकारका स्वास्थ्य सास्या रहेको छ । 

झलनाथ खनाल राति आँखा देख्दैनन् । रतन्धोको समस्या भएका उनी अँध्यारो भएपछि सहयोगीबिना हिँडडुल पनि गर्न सक्दैनन् । खनाललाई मुटुको पनि समस्या छ । उच्च रक्तचापका कारण कहिलेकाहीँ मुटुमा समस्या देखिन थालेको छ । 

लोकतान्त्रिक समाजवादी पार्टीका नेता राजेन्द्र महतो र महन्थ ठाकुर पनि बिरामी छन् । राजेन्द्र महतो उच्च रक्तचाप र मधुमेहका बिरामी हुन् भने ठाकुर मुटु रोगबाट ग्रसित छन् । ठाकुरले त मुटुमा पेसमेकर नै राखेका छन् । साथै, उनलाई उच्च रक्तचाप र मधुमेह पनि छ ।

 राष्ट्रपति पौडेल १८ चैतमा पेटमा समस्या देखिएपछि त्रिवि शिक्षण अस्पताल महाराजगन्ज भर्ना भएका पौडेल त्यसको ४ दिनपछि अर्थात् २२ चैतमा डिस्चार्ज भएका थिए । त्यसपछि ४ वैशाखमा पौडेल त्रिवि शिक्षण अस्पतालमै पुनः स्वास्थ्य परीक्षण गराउन गएका थिए । त्यस समयमा उनको अल्ट्रासाउन्ड गरिएको थियो । ५ वैशाखमा छातीमा समस्या देखिएपछि पौडेललाई पुनः शिक्षण अस्पताल पु¥याइयो । पौडेलको छातीमा समस्या भएपछि त्रिवि शिक्षण अस्पतालमा उपचारका लागि भर्ना गरिएको थियो । तर, छातीमा संक्रमण देखिएपछि नेपालका चिकित्सक र परिवारको सुझावमा उनलाई थप उपचारका लागि ६ वैशाखमा भारत लगियो ।

अल इन्डिया इन्स्टिच्युट अफ मेडिकल साइसेन्मा १२ दिनको उपचारपछि १७ वैशाखमा पौडेल स्वदेश फर्किएका थिए । पौडल आज फेरी अस्पताल पुगेका छन् ।  

काँग्रैस सभापति देउवा केही वर्षअघिदेखि सिंगापुरको अस्पतालमा नियमित उपचार गराउँदै आएका छन् । पेटसम्बन्धी समस्याका कारण स्वास्थ्य जटिलता भोगिरहेका देउवाले लामो समयदेखि सिंगापुरमा उपचार गर्दै आएका हुन्  । यसअघि २०७६ जेठमा स्वास्थ्य उपचारका लागि देउवा सिंगापुर गएका थिए । देउवाले सिंगापुरको माउन्ट एलिजाबेथ अस्पतालमा पेटको जाँच गराएका थिए ।

देउवाले २०७० देखि नै सिंगापुरको माउन्ट एलिजाबेथ अस्पतालमा उपचार गराउँदै आएका छन् । पेट र उच्च रक्तचापको समस्याबाट देउवा लामो समयदेखि पीडित छन् । पेटको समस्याकै कारण उनले धुम्रपान छोडेका थिए । 

 अर्का बिरामी नेता हुन्, पूर्व प्रधानमन्त्री तथा नेकपा एमालेका अध्यक्ष केपी शर्मा ओली । ओली, मिर्गौला पीडित हुन् । ओलीले करिब १६ वर्ष पहिले र २०७६ सालमा गरी २ पटक मिर्गौला प्रत्यारोपण गरिसकेका छन् । पहिलो पटक भारतको एपोलो अस्पतालमा मिर्गौला प्रत्यारोपण गरेका ओलीले उक्त मिर्गौलाले काम गर्न छाडेपछि २१ फागुन, २०७६ सालमा दोस्रो पटक नेपालमै प्रत्यारोपण गराएका थिए । ओलीले महाराजगन्जस्थित त्रिवि शिक्षण अस्पतालमा दोस्रो पटक मिर्गौला प्रत्यारोपण गराएका थिए । 

१८ देखि २७ साउनसम्म उनी मिर्गौलाकै परीक्षण गर्न सिंगापुर पुगेका थिए । सिंगापुरको न्यासनल युनिभर्सिटी अस्पतालमा परीक्षण गराएर ओली नेपाल फर्किएका थिए । त्यसको १ सातापछि नै ५ भदौमा फेरि उपचारका लागि भन्दै सिंगापुर गएका थिए । त्यस समयमा उनको मिर्गौलाको थप परीक्षण र क्षमता अभिवृद्धिका लागि उपचार गरिएको थियो । त्यस समयमा ओली प्रधानमन्त्री रहे पनि उनको उपचार खर्च सरकारबाट नबेहोरिने र निजी खर्चमै सबै उपचार गरिने कुरा उनको सचिवालयले जनाएको थियो ।

यसरि प्रमुख दलहरूका नेताहरू लगातार बिरामी हुँदा देशको ठुलो रकम यिनीहरूको उपचारमा खर्च हुने गरेको छ । यसै  बिचमा विभिन्न पार्टीका नेताहरूले भने स्वदेशमै उपचार गर्ने र उपचारको खर्च आफैले व्यहोर्न बताएका छन् ।

 राज्य को उच्च पदमा बसेका वा जिम्मेवारी सामालेका व्यक्तिहरू बिरामी हुँदा राज्यले उपचारमा सहयोग गर्ने राज्यको जिम्मेवारी हो । तर, पछिल्लो समयमा नेताहरू सामान्य रुघा खोकी लाग्दा उपचारका लागि विदेश जाने गरेको भन्दै उपचारमा राज्य कोषबाट दिइने रकम कटौती गर्नुपर्न आवाजहरू उठ्दै आएका छन् ।