काठमाडौं । प्रमुख सत्तारुढ दल नेपाली कांग्रेसका नेता डा. शेखर कोइरालाले आगामी चुनावमा १०० सिटभन्दा कम लिएर चुनावमा जाँदा राम्रो नहुने बताएका छन् । 

विपी जन्मजयन्तीको अवसरमा नेपाल प्रेस युनियन केन्द्रीय समितिले जनकपुरमा बिहीवार आयोजना गरेको ‘विपी विचार, प्रेस तथा अभिव्यक्ति स्वतन्त्रता र अबका चुनौती’ विषयक विचार गोष्ठीलाई सम्बोधन गर्दै कोइरालाले यस्तो बताएका हुन् ।

कार्यक्रममा उनले भने, ‘यो गठबन्धन विचित्रको छ । एकातिर जननायक विपी कोइरालाले दिनु भएको विचार र सिद्धान्त बोकेको कांग्रेस छ । अर्कातिर आफूलाई कम्युनिष्ट भन्नेहरू छन् । उनीहरूसित हाम्रो केही कुरा पनि मिल्दैन । विचार र सिद्धान्त नमिले पनि गठबन्धन गर्‍यौं ।

एमालेले संविधानलाई ‘डिरेल’ गर्ने प्रयास गरेको कारण गठबन्धन बनेको र गठबन्धन पवित्र हो वा अपवित्र भन्ने कुरा चुनावपछि मात्रै थाहा हुने उनले बताएका छन् । एमालेलाई परास्त गर्नको लागि मात्रै गठबन्धन बनेको उनले दाबी गरे । 

तर, गठबन्धन गरेर पनि कांग्रेसले एकल बहुमत ल्याउन नसके विद्रोह र विग्रह हुने कोइरालाले बताए ।

‘गठबन्धन एकल बहुमत ल्याउन गर्ने हो । पाँच वर्ष स्थायी सरकार दिन्छौँ, भनेका छौँ । सरकार बनाएर जान मात्रै गठबन्धन सोचेको भए त्यसले हामीलाई अप्ठ्यारो पार्छ । माओवादी र समाजवादीहरू कांग्रेसलाई सय सिट दिन तयार नभएको र गठबन्धन गर्दा धेरै सिट घट्न सक्ने उनले बताए । 

उनले नेपाली कांग्रेस १६५ सिटमै उठ्यौँ भने पनि नपुग्ने अवस्था छ । तालमेल गर्दा धेरै सिट घट्न सक्छ । त्यसले हामीबीच विग्रह र विद्रोह आउँछ । कांग्रेसमा समस्या बढ्न सक्छ । 

अहिलेको सरकारले गरिरहेको कामबारे पनि कोइरालाले प्रश्न उठाएका छन् । संक्रमणकालीन विषयसँग सम्बन्धित विधेयक र मिडिया काउन्सिल विधेयक गम्भिररूपमा अगाडि आइरहेको उनले बताए । पीडितले पुनरावेदन गर्ने अवसर पनि नदिने गरी विधेयक आएको भन्दै उनले त्यसलाई पुनर्विचार गर्नुपर्ने बताए ।