काठमाण्डौ।   गृहमन्त्री सुदन गुरुङले सामाजिक सञ्जालमा पक्राउ परेका व्यक्तिहरूको संख्या ‘स्कोरबोर्ड’ जस्तो शैलीमा सार्वजनिक गरेपछि चौतर्फी आलोचना सुरु भएको छ। उनले आफ्नो फेसबुकमार्फत ‘७ र ७’, ‘८’, ‘१०’ जस्ता अंक पोस्ट गर्दै कति जना समातिए भन्ने अपडेट दिएका थिए, जसले धेरैलाई आश्चर्यचकित बनाएको छ।

सामाजिक सञ्जाल प्रयोगकर्ताहरूले यस्तो प्रस्तुति गृहमन्त्रीजस्तो जिम्मेवार पदमा रहेका व्यक्तिबाट अपेक्षित नभएको बताएका छन्। कानून कार्यान्वयनजस्तो संवेदनशील विषयलाई खेलको स्कोरझैँ देखाउनुले राज्यको गम्भीरता र विश्वसनीयतामाथि असर पार्ने टिप्पणी गरिएको छ।

आलोचकहरूले पक्राउ प्रक्रिया कानुनी र गम्भीर विषय भएकाले यसलाई मर्यादित र जिम्मेवार ढंगले सार्वजनिक गर्नुपर्ने बताएका छन्। “कति जना पक्राउ परे भन्ने कुरा स्कोर बनाएर देखाउनु उपयुक्त होइन,” भन्ने प्रतिक्रिया व्यापक रूपमा देखिएको छ।

यसैबीच, केहीले पार्टी नेतृत्वतर्फ पनि ध्यानाकर्षण गराएका छन्। पार्टी सभापति रवि लामिछाने र प्रधानमन्त्री बालेन शाहलाई यस्तो व्यवहार रोक्न पहल गर्न सुझाव दिइएको छ। उनीहरूले गृहमन्त्रीको भूमिकाले परिपक्वता र संवेदनशीलता झल्किनुपर्नेमा जोड दिएका छन्।

विश्लेषकहरूका अनुसार सार्वजनिक पदमा रहेका व्यक्तिहरूले सूचना प्रवाह गर्दा भाषा र शैलीमा विशेष ध्यान दिनुपर्छ। अन्यथा यस्ता गतिविधिले नागरिकको विश्वासमा नकारात्मक असर पार्न सक्ने चेतावनी दिइएको छ।