अछाममा बाघको आक्रमणबाट एक जना गम्भीर घाइते भएका छन् । जिल्लाको ढकारी गाउँपालिका– ४ घर भई हाल कैलालीको मोहन्याल गाउँपालिका–१ बस्ने ४९ वर्षीय धर्मसिंह थापा शनिबार दिउँसो बाघको आक्रमणमा परी गम्भीर घाइते भएका हुन् ।

थापा ससुराली दाउन्मोराबाट आफ्नो घर भिरमुड फर्किँदै गर्दा बसन्त सामुदायिक वनअन्तर्गतको बुकखोला डाँडामा दिउँसो करिब ३ बजे बाघले आक्रमण गरेको जिल्ला प्रहरी कार्यालय अछामले जनाएको छ । आक्रमणका क्रममा थापाको दुवै गाला, टाउको र बायाँ हातको पाखुरामा गहिरो चोट लागेको बताइएको छ ।

उपचारका लागि घाइते थापालाई जिल्ला अस्पताल मङ्गलसेन पुर्‍याइएको थियो । थापा अचानक भएको बाघको आक्रमणमा परेपछि सो क्षेत्रमा स्थानीयवासी त्रसित बनेका छन् ।