काठमाण्डौ।अर्जेन्टिनामा समुद्र रातारात गायब भएको भन्दै सामाजिक सञ्जालमा फैलाइएको दाबी भ्रामक पाइएको छ। भाइरल भिडियोमा समुद्री पानी तटबाट निकै पछाडि हटेको दृश्य वास्तविक भए पनि समुद्र सुकेको वा स्थायी रूपमा गायब भएको भने होइन।

सामाजिक सञ्जालका विभिन्न पोस्टमा ‘२६ अगस्ट २०२६ मा अर्जेन्टिनाको समुद्र अचानक गायब भयो’, ‘समुद्रको पिँध फुटेर पानी भित्र छिर्‍यो’ तथा ‘ठूलो प्राकृतिक विपत्ति आउन लागेको संकेत’ जस्ता अपुष्ट दाबी गरिएको छ। तर ती दाबी पुष्टि गर्ने कुनै आधिकारिक तथा वैज्ञानिक प्रमाण भेटिएको छैन।

उक्त दृश्य अर्जेन्टिनाको प्रमुख तटीय सहर मार डेल प्लाटामा समुद्री पानी असामान्य रूपमा पछाडि हटेको घटनासँग मिल्छ। सो क्षेत्रमा शक्तिशाली उत्तर–पूर्वी हावा लगातार चल्नु र न्यून ज्वार अर्थात् ‘लो टाइड’को समय एकैपटक पर्नु घटनाको मुख्य कारण रहेको स्थानीय विवरणमा उल्लेख छ।

तीव्र हावाले समुद्री सतहमा दबाब सिर्जना गरी पानीलाई तट तथा बन्दरगाहतर्फ आउन रोकेको थियो। त्यसै समयमा न्यून ज्वार पनि परेपछि समुद्र सामान्य अवस्थाभन्दा धेरै पछाडि हटेको देखिएको हो। पानी पछाडि हट्दा समुद्री पिँधको ठूलो भाग देखिनुका साथै केही जहाज हिलोमा अड्किएका थिए।

तर हावाको गति र ज्वारको अवस्था बदलिएपछि समुद्रको पानी पुनः फर्किएको थियो। त्यसैले यसलाई समुद्र गायब भएको, सुकेको वा पृथ्वीभित्र पसेको घटनाका रूपमा व्याख्या गर्नु गलत हुन्छ। यो निश्चित मौसम तथा ज्वारभाटाको संयुक्त प्रभावबाट उत्पन्न अस्थायी प्राकृतिक अवस्था थियो।