न्युयोर्क । सामाजिक सञ्जालको इतिहासमा नै सबैभन्दा ठुलो ह्याकको घटनामा गत महिना अमेरिकालाई सुपुर्दगी गरिएका बेलायती नागरिकले आफ्नो भूमिका रहेको स्वीकार गरेका छन् । सन् २०२० को जुलाई महिनामा १३० वटाभन्दा बढी हाईप्रोफाइनल ट्विटर अकाउन्टहरू ह्याक भएका थिए । यसमा बराक ओबामा र जो बाइडेनसमेतको ट्विटर पनि सामेल थियो ।

प्लगवाकजो भनेर चिनिने २३ वर्षीय जोसेफ जेम्स ओ’कनरले ह्याक गरेको घटनामा आफ्नो अपराध स्वीकार गरेका हुन् । यसमा अधिकतम सजाय ७० वर्षको रहेको छ । सो ह्याकिङ ठुलो स्तरको बिटकोइन स्क्यामसँग सम्बन्धित रहेको थियो ।

स्पेनबाट सुपुर्दगी गरिएका जोसेफले कयौँ ट्विटर अकाउन्टहरू ह्याक गरेर त्यहाँबाट ट्विट गर्दै एउटा अकाउन्टमा बिटकोइन पठाउन आग्रह गरेका थिए । उनले त्यो रकमलाई दोब्बर बनाइदिने वचन दिएका थिए ।

जोसेफसहित यस घटनामा अन्य तीन जनाविरुद्धको मुद्दा चलाइएको थियो । अमेरिकी किशोर ग्राहम इभान क्लार्कले सन् २०२१ मा आफ्नो गल्ती स्वीकार गरेका थिए । त्यस्तै ओर्लान्डोका निमा फजेली र बेलायतका मेसन सेफर्डविरुद्ध पनि मुद्दा दायर गरिएको थियो ।

सन् २०२० मा करिब ३५ करोड ट्विटर प्रयोगकर्ताहरूले चर्चित अकाउन्टहरूबाट सो ट्विट देखेका थिए । यसमा हजारौँ मानिसहरू धोकाधडीको सिकार बनेका थिए । ट्विटरका लागि सो समय यो ठुलो लज्जाको विषय बनेको थियो । एजेन्सी / बीबीसी