काठमाडौँ । काठमाडौँ महानगरपालिकाले सडक पेटीमा धुवाँ आउने गरी सेकुवा पोल्न रोक लगाएको छ ।  महानगरपालिकाले काठमाडौँका विभिन्न ठाउँमा सेकुवा पोल्न बन्देज लगाएको हो । महानगरपालिकाले नगर प्रहरी मार्फत पुतली सडक, सिनामंगल क्षेत्रमा सेकुवा पोल्दा वायु प्रदूषण भएको भन्दै रोक लगाउन सुरु गरेको हो ।

आफूहरूले  भेट जतिको ठाउँमा सडक र सडक पेटीमै धुवाँ आउने गरी सेकुवा पोल्न बन्द गर्न भनेका  महानगर प्रहरी प्रमुख राजु पाण्डेले बताएका छन् । पुतलीसडक र सिनामंगलमा अरूलाई असर गर्ने गरी सेकुवा पोलेको भेटिएको छ, अन्य स्थानमा पनि भेटिए बन्द गर्न  भनेका उनले बताएका छन् । 

महानगरपालिकामा सेकुवाको कारण वायु प्रदूषण भएको, सडक पेटीबाट हिँड्दा यात्रुलाई सास्ती भएको भन्दै कल सेन्टर र वडाहरूमा पनि गुनासो समेत आउन थालेको  बन्द गराउन लागिएको महानगरले जनाएको छ । 

महानगरपालिकाले यही सातादेखि सेकुवा पसलहरूलाई सूचित गराउन थालेको हो । महानगरपालिकाका अनुसार सेकुवा पसलेले अरूलाई असर पर्ने गरी धुवाँ निकाले सुरुमा सचेत गर्ने, त्यसपछि पनि नमाने कारबाही नै गर्ने  तयारी गरेको छ ।