काठमाडौं । चर्चित भारतीय फिल्म निर्देशक एसएस राजामौलीको फिल्म'आरआरआर' अस्करमा प्रवेश गरेको छ। अस्कर २०२३ को लागि बुधबार गरिएको १० वटा विधाको शर्टलिस्टिङमा आरआरआर 'ओरिजिनल सङ्स्' विधामा प्रवेश गरेको हो।

यस्तै भारतबाट अस्करको लागि आधिकारिकरूपमा पठाइएको 'छेलो शो' इन्टरनेशनल फिचर फिल्म विधामा शर्टलिस्टिङमा परेको छ। भारतसहित विश्वका विभिन्न देशमा फिल्म आरआरआरलाई निकै मन पराइएको थियो। गम्भीर विषयवस्तु र यथार्थपरक सिनेमाले मात्र दर्शकको ध्यान तान्छ, त्यस्ता सिनेमा मात्र दर्शकले सम्झिरहन्छन् भन्ने भाष्यलाई गलत सावित गर्दै आरआरआरले उल्लेख्य कमाएको थियो भने राम्रो समीक्षा पनि पाएको थियो।

आरआरआरलाई पहिला उत्कृष्ट फिचर फिल्म विधामा मनोनयनका लागि पठाइएको थियो। राजामौलीले फिल्मलाई अस्करमा पठाउन अभियाननै चलाएका थिए।

यस्तै अन्तिम समयमा अस्कर २०२३ को लागि फिल्म कांतारा पनि मनोनयनका लागि पठाइएको छ। फिल्म निर्माण युनिटले फिल्म मनोनयन हुनेमा आश व्यक्त गरेका छन्। एजेन्सी