काठमाण्डौ। माओवादी केन्द्रको विद्यार्थी संगठन अखिल क्रान्तिकारीले निर्वाचनमार्फत आफ्नो नेतृत्व चयन गर्दैछ । नेतृत्व चयनको क्रममा गुटमा विभाजित बनेको अखिल क्रान्तिकारी विद्यार्थी संगठनमा प्रचण्डदेखि जनार्दन शर्मासम्मको प्यानल प्रतिस्पर्धामा उत्रिएपछि माओवादी पार्टी  गुटै-गुटको प्रतिविम्व विधार्थी सगठनको चुनावमा छताछुल्ल बनेका छन् । माओवादी केन्द्र निकट विद्यार्थी संगठन अखिल क्रान्तिकारीले ३२ वर्षको उमेरहद लगाएर नेतृत्व चयनमा उत्रिदै गर्दा गुटहरु छताछुल्ल हुन पुगेका छन् । 

सर्वसम्मतिको प्रयासबाट नेतृत्व चयन गर्ने प्रचण्डको चाहनामा निर्वाचनले ब्रेक लगाइदिएपछि विद्यार्थीमा कसका कस्ता गुट   छन  त ? 

जनार्दन शर्मा गुट- अध्यक्षमा हेमन्त राईलाई अघि सार्दै जनार्दनले विद्यार्थीमा आफ्नो पकड जमाउने कोसिस गरिरहेका छन् । जनार्दन पक्षधर विद्यार्थी नेताहरुले प्यानल नै बनाएर निर्वाचनमा होमिएका छन् भने यो समूहमा विद्यार्थी नेता मदन भट्टराई लगायतका नेताहरुले भूमिका निर्वाह गरिरहेको बताइन्छ । जनार्दन समूहमा सुदन किराति लगायतका नेताहरुले समेत खुलेरै राईलाई अध्यक्ष निर्वाचित गराउन भूमिका खेलिरहेका छन् । 

वर्षमान पुन गुट-वर्षमान पुन निकटको विद्यार्थी अध्यक्षमा सुदिन पौडेलले प्रतिस्पर्धा गर्दैछन् । पौडेललाई पुनले मैदानमा उतारेका हुन् भने उनले पनि प्यानल नै बनाएर अघि बढेका  छन् । यो समूहमा विद्यार्थीका पूर्वअध्यक्ष रञ्जित तामाङदेखि दिपेश पुन लगायतका नेताहरु सक्रिय बनेको बताइन्छ ।

नारायणकाजी श्रेष्ठ गुट-मधेसको अनुहारसहित नारायणकाजी श्रेष्ठ पनि विद्यार्थीको नेतृत्वका लागि गुटसहित अघि बढेका छन् । यादव नै मधेस समूदायबाट पहिलो अध्यक्षको दाबेदार भएको दाबी गर्दै यो समूह चुनावी मैदानमा होमिएको हो । यसमा अखिल क्रान्तिकारीमा विद्रोही नेता भनेर चिनिएका पवन कार्कीसहितका नेताहरुले सक्रिय भूमिका निर्वाह गरिरहेको बताइन्छ ।

प्रचण्ड गुट-विद्यार्थीको नेतृत्वका लागि प्रचण्डको समूहले शक्ति बस्नेतलाई अघि सार्दै सापकोटालाई निर्वाचित गराउने गरि काम गरिरहेको छ ।यसमा पनि विद्यार्थी निवर्तमान अध्यक्ष पञ्चा सिंहसहित   मिलन एमसी र तुकमान महरा लगायतको टोली सक्रिय रहेको बताइन्छ । यसमा उम्मेदवारी फिर्ता लिने योगेन्द्र बुढा पनि सहभागी बनेका छन् । उनी कृष्णबहादुर महरा निकटका हुन् ।

जनार्दनको चुनौति अब पार्टी नेतृत्वतर्फ

जनार्दन शर्माले पार्टीको नेतृत्व पनि निर्वाचनमार्फत हुनुपर्ने माग गरिरहेका छन् । सर्वसम्मतिको नेतृत्व भन्दै अध्यक्ष बनिरहेका प्रचण्डलाई अब विद्यार्थीमा देखिएको गुटले समेत प्रभाव पार्ने विश्लेषण भइरहेको छ । यस्तोमा प्रचण्डले समेत अब पार्टीमा निर्वाचनको सामना गर्नुपर्ने स्थिति आउने देखिन्छ । अझ, वर्षमान–जनार्दन पक्षले विद्यार्थीको नेतृत्वमा बाजी मारेमा यसले थप खतरा पैदा गर्नेछ । जुन विषय प्रचण्डका लागि समेत घातक हुनसक्ने विश्लेषण भइरहेको छ ।