काठमाण्डौ। नेकपा(मशाल)का महासचिव सन्त वहादुर नेपालीले आज एक वक्तव्य जारी गरेकाछन। करिब दुई दशकको संसदीय अभ्यासले के पुष्टी गरिदियो भने देशको राजनीति, आर्थिक तथा सामाजिक, सांस्कृतिक सबै क्षेत्रमा दलाल पुँजीवादले कब्जा जमाएको छ । त्यसकारण देशको अवस्था झन्‌पछि झन् गिर्दो अवस्थामा पुगेको छ र देश अब असफल राष्ट्रमा परिणत हुँदै गएको हुँदा देशमा कतै विदेशी शक्तिहरूले प्रत्यक्ष हस्तक्षेप गर्ने र देशको अस्तित्व नै समाप्त हुने त होइन ? भन्ने खतरा उत्पन्न भएको छ । देशलाई यो दुरावस्थामा पुर्‍याउने कार्यमा आजका सत्तापक्षीय गठबन्धन तथा प्रतिपक्ष दुवै जिम्मेवार रहेका छन भनिएको छ। 

सत्ता गठबन्धन तथा प्रतिपक्ष दलहरू अहिले “मिशन ०८४” को लक्ष्य प्राप्तितर्फ लागेका छन् । उनीहरूलाई देशको चिन्ता छैन । जनता महङ्गी, भ्रष्टाचार, घुुस, तस्करी, माफियागिरी, कमिशन, नातावाद, कृपावाद, कालो बजारी लगायत लुटतन्त्रबाट आहत छ्रन् । एक करोडभन्दा बढी नागरिक जीविकोपार्जनका निम्ति विदेश पलायन भएका छन् । गाउँ रित्तिएको छ । पुँजी पलायन भएको छ । खर्बौँ ऋणको बोझले देश थिचिएको छ । व्यापार घाटाले देश आर्थिक सङ्कटबाट गुज्रिरहेको छ । यही मौकाको फाइदा उठाएर कतिपय राजावादी तत्वहरू पूर्व राजा ज्ञानेन्द्रलाई पुनः सिंहासनमा स्थापित गर्ने सपना देखिरहेका छन् । फेरि निरङ्कुश, तानाशाही र अधिनायकवादी शासन ल्याउन प्रयास गरिरहेका छन् । तर आजको नेपाली समाज धेरै अगाडि बढिसकेको हुनाले राजतन्त्रको पूनस्र्थापना गर्न सकिन्छ भनेर कसैले कल्पना पनि गर्छ भने त्यो मूर्खता शिवाय केही हुने छैन ।  कुनै पनि प्रकारको प्रतिगमनको कडा विरोध गर्दछौ भनि वक्तव्यमा उल्लेख गरेका छन।

काङ्ग्रेस, एमाले, माओवादी, मधेश केन्द्रित लगायतका दलहरूले उत्पन्न गरेको यो सङ्कटको समाधान राजतन्त्रको पूनस्र्थापनाबाट हुन सक्दैन । देशमा पुँजीवादी गणतन्त्र स्थापनापछि जुन प्रकारले देश नव औपनिवेशिकरणतर्फ गएको छ र उद्योग, व्यापार, शिक्षा, स्वास्थ्य, कृषि, आदिमा दलाल पुँजीवाद बलियो बन्दै गएको छ तथा जुनप्रकारले संसदवादी दलहरू साम्राज्यवाद तथा विस्तारवादको निर्देशनमा असफल राष्ट्र बनाउदै लगिरहेका छन्, यो स्थितिमा देश अब स्वाधीन, स्वतन्त्र र आत्मनिर्भर रहन सक्दैन भन्ने सङ्केत देखा परेको छ । यो अवस्थामा प्रतिगामी शक्तिहरूका हर्कतहरूको विरोध गर्दै नयाँ जनवादी व्यवस्थाका लागि देशका तमाम देशभक्त, जनवादी, वामपन्थी शक्तिहरू आन्दोलमा उत्रनु पर्ने आवश्यकता भएको छ । नयाँ जनवादी व्यवस्थाको स्थापनाका लागि सच्चा देशभक्त वामपन्थी क्रान्तिकारी शक्तिहरू एकताबद्ध हुनुपर्ने आवश्यकता देखिएको छ । 

सामान्यतः अहिले जनताले युटुव, इन्स्ट्राग्राम, टिकटक, ट्वीटर आदिबाट आफ्नो अभिव्यक्ति प्रकट गर्ने गरेका छन् । त्यसक्रममा कतिपय छाडा र अपराधी मनोवृत्तिका व्यक्तिहरूले सामाजिक संञ्जालको दुरूपयोग पनि गरेका छन् । तर त्यसैलाई आधार बनाएर जनताको अभिव्यक्तिको स्वतन्त्रता कुण्ठित हुनेगरी सामाजिक संजालमाथि नै रोक लगाउनु सरकारको सामन्ती अधिनायकवादी चरित्र देखिएको छ । टिकटकलाई गलत प्रकारले प्रयोग गर्ने प्रयोगकर्ताहरूलाई निरुत्साहित गर्न सरकारले विधि तयार गरी नियमन गर्न आवश्यक छ । तर टिकटक माथिको प्रतिबन्ध तत्काल हटाउनु उपयुक्त हुने छ भनि वक्तव्यमा भनिएको छ।