काठमाडौं । आजभन्दा १७ वर्ष पहिले रौतहटको गौरमा भएको हत्या प्रकरण फेरि विवादमा आएको छ । पीडितसँग सरकारले न्यायको प्रतिबद्धतासहित सहमति गरेपछि जनता समाजवादी पार्टी तरङ्गित बन्न पुगेको छ ।गौर प्रकरणमा उपेन्द्र यादव नै तानिने डरपछि सरकारको समिकरणमाथि नै आशंका उत्पन्न भइरहेका बेला प्रचण्डले अनुसन्धान अघि बढाउलान ?

माओवादी केन्द्रमा लामो समय राजनीति गरेर छुट्टै पार्टी खोलेका आम जनता पार्टीका अध्यक्ष प्रभु साह यतिबेला गौर प्रकरणलाई चर्काउदै लग्ने पात्रमा पर्छन् ।  जसपा अध्यक्ष उपेन्द्र यादवलाई फसाएर आफ्नो राजनीति अघि बढाउने योजनामा साह छन् ।

२७ माओवादी नेता कार्यकर्ताको पाशविक ढंगले गरिएको हत्याको छानविन सरकारले नगरेको भन्दै पीडितहरु आन्दोलनमा थिए । तर, पुष्पकमल दाहाल ’प्रचण्ड’ ले १७ वर्षपछि यो प्रकरणमा अनुसन्धान गर्ने प्रतिबद्धतासहित सहमति त गराए । तर, के अनुसन्धान संभव होला ? प्रश्न गर्न थालिएका छन् ।

सरकारले पीडितसँग सहमति गरेपछि जनता समाजवादी पार्टी भने त्रसित बन्न पुगेको छ । जसपाले पत्रकार सम्मेलन नै गरेर सरकारले चालेको कदमले गम्भीर समस्या निम्त्याउने भन्दै चेतावनी नै दिएको छ ।जसपाले गौर प्रकरणको अनुसन्धानमा आफ्ना पार्टीका अध्यक्ष उपेन्द्र यादव र नेताहरु नपर्नुपर्ने माग राख्न थालेको छ ।

जसपाले गौर प्रकरणको फेहरिस्त सुनाउदै यसको प्रमुख दोषी नै माओवादी र प्रभु साहलाई मान्दै आएको छ । तत्कालीन मधेसी जनअधिकार फोरम र माओवादीबीच भएको झडपको क्रममा २७ माओवादी कार्यकर्ताको फोरमका कार्यकर्ताले हत्या गरेका थिए ।फोरम कार्यकर्ताले लाठी र भाला रोपेर माओवादी कार्यकर्ताहरुको विभत्स हत्या गरेका थिए । तर, यो प्रकरणको अन्तिम टुंगो लगाउने बेला जसपाले आपत्ति जनाउन थालेको छ ।

आफ्ना पार्टीका नेता कार्यकर्तालाई फसाउन खोजिएको आरोप जसपाको छ । तर, अनुसन्धान प्रक्रिया नै थाल्न दिन्नौं भन्दै जसपाले सत्ता र समाजवादी मोर्चाबाट बाहिरिने धम्की दिन थालेपछि भने सरकारले यो प्रकरणलाई अघि बढाउला त ? प्रश्न भने उब्जिन पुगेको छ ।गौर प्रकरणको विषय सार्वजनिक भएपछि कतिपयले भने चितवनको माडी घटनाको पनि छानविन हुनुपर्ने आवाज उठाउन थालेका छन् ।

गौर प्रकरणमा आन्दोलन गर्दै आएका पीडितले भने प्रचण्ड नेतृत्वको सरकारले केहि गर्छ कि भन्ने अपेक्षा गरेका कारण पनि जसपाको माग कुन स्थितिमा पुग्छ भन्ने प्रश्न भने कायमै रहेको छ।