काठमाडौं । नेपाल कम्युनिष्ट पार्टीका महासचिव नेत्रविक्रम चन्द विप्लवले मुलुकमा संघीयताको औचित्य नभएको बताएका छन । रिपोर्टर्स क्लव नेपाल लुम्बिनी प्रदेश कार्यलयले कपिलवस्तुमा आज आयोजना गरेको साक्षात्कार कार्यक्रममा उनले हालको नेता व्यवस्थापन संघीयताभन्दा जनताको समानुपातिक संघीयता आवश्यक भएको जनाएका छन् ।

प्रदेश र संघको निर्वाचनमा आएको मतपरिणामले दलहरूको औचित्यमाथि समेत प्रश्न उठेको भन्दै पछिल्लो समय राज्यको आर्थिक संकटले मुलुकको अवस्था निकै कमजोर भएको र राज्यले विशेष आर्थिक नीति नल्याए नेपाल श्रीलंकाभन्दा थप संकटमा पर्ने उल्लेख गरेका छन् ।

महासचिव विप्लवले अब संघीयता देशले धान्न नसक्ने भएकाले विशेष आर्थिक नीतिको खाँचो गरेका छन् । उनले मंसिर ४ निर्वाचनको औचित्य पुष्टि नभएको पनि टिप्पणी गरेका छन् । ‘मंसिर ४ निर्वाचनले जनतामा खुसी दिएन ‘अब अहिलेको अभ्यासको संघीयता र निर्वाचन प्रणालीको पनि औचित्य सकिएको छ ।’

महासचिव विप्लवले आफूहरूसँग तत्कालीन केपी ओली नेतृत्वको सरकारले गरेको तीनबुँदे सहमति अहिलेको सरकारले कार्यान्वयन नगरेको भन्दै आक्रोष प्रकट गरेका छन् । विप्लवसहितका साना कम्युनिष्ट पार्टीले मंसिर ४ को निर्वाचन बहिष्कार गरेका हुन् । उनीहरूले यो संसदीय व्यवस्थाको निर्वाचनले देशलाई झन लुट्ने भन्दै निर्वाचनमा भाग लिएका थिएनन् ।